Oh Gorm, Santa! is yuh boy from Trini here again.
Last year from me list, you only grant me one outta ten.
But ah coming back, 'cause ah know dis time ah really gone clear.
An' ah hoping to have better luck here wid you dis year.
De fus t'ing ah want nex' year is ah little more peace.
An' I ain't mean no peace in Pakistan an' de Middle East.
Ah want peace right here in we own Gaza an' we Gully.
An' fuh schoolchildren to start beating book an' to stop wid dis folly.
Ah wishing we get ah new Integrity Commission,
Without de Father and President committing sins of omission.
Ah know dat de public just would not leave dem all alone,
Even though is he who is without sin should cast de first stone.
Ah wish dat Calder remain strong in he body, mind and he Hart.
He have to remain dey an' keep on building to play he part.
An' although de Rottweiler hot an' heavy dey on he trail,
de Rottweiler pardners only setting trap to make he get jail.
He sniffing and smelling out corruption like a big bloodhound.
But de party hierarchy going an' lock him down in de dog pound.
Dey go be feeding him bread an' water, stale rice an' some noodle
When dey done wid him, de Rottweiler reduce right down to a poodle.
Ah wish dat we have 'bout three more summit in dis town nex' year
'Cause is only fuh Summit de bandit and dem does be in some fear.
Road does get pave, street does get wash, painting at a pace.
An' every corner yuh turn is ah set ah Police all over de place.
These things is not just for Summit dey saying, trying to fool us.
Buh when yuh look at it de timing is just so very curious
We doh care if it ain't fuh Summit, call it what yuh want.
Jus' make sure nex' year yuh give we ah Summit every odder month.
Santa nex' year ah want ah barrel ah oil reach ah million dollars.
So we could keep on spending money like water an' doh get no horrors.
All who object to de smelter and to de rapid rail.
We go give dem ten smelter an' ten rapid rail in dey tail.
Santa stop all dem protesters for water who doh know what dey want.
Instead ah water, dey get ah magnificent waterfront.
An' all dem tax agitators by Parliament, do not let dem enter
Just give dem tickets an' ah free show in de Performing Arts Centre.
Ah tour inside there will be de sure t'ing just to cool dem off
Yuh se how we arrange a private viewing just for Prof Uff
The beauty inside there will inspire and quell any riot
Just wait an' see when de report come how everything go be quiet.
Santa, may Panday live long to torment all his frienemies
An' all those who hang on to his coat tails like ah dog an' his fleas.
May he win de elections called on January twenty-fourth.
And all their plotting an' scheming against him shall come to nought.
Santa, may de CJ be just as strong nex' year wid he speech
But we doh want no messy business wid anyt'ing 'bout trying to impeach
Yuh know dat he jus' talk from de heart an' say what on he mind
But Santa, tell him dat in dis town dey say time longer dan twine.
An' Santa, de last t'ing ah must thank yuh for is reducing inflation.
Yuh have de gratitude an' de thanks of de entire nation.
But Santa, nex' time yuh doing somet'ing like dat, do it so we could see it
"Cause dey say inflation down, but is more licks and tax on we wallet.
So Santa ah gone, have ah good time, ah go see yuh nex' year.
Ah look forward to 2010 as a time of peace without fear.
Yuh promise me plenty last year an' didn't deliver, ah was really pissed,
So dis year ah making public my entire Christmas Wish List.